Ukrayna millisində ciddi itki – AÇ-2020-ni buraxacaq

Ukraynanın “Şaxtyor” klubu ciddi itki ilə üzləşib.

Komanda.az xəbər verir ki, Donetsk təmsilçisinin hücumçusu Junior Moraes zədələnib. Bu barədə klubun mətbuat xidməti məlumat yayıb. Məşqdə zədələnən Moraes azı 6 ay yaşıl meydanlardan uzaq qalacaq.

Moraes Ukrayna milli komandasının da üzvüdür. Hücumçu zədə səbəbindən bu yay keçiriləcək AÇ-2020-ni buraxacaq.

AÇ-2020 bu il iyunun 11-dən iyulun 11-dək keçirilməlidir. Ukrayna yığması turnirin qrup mərhələsində Niderland, Avstriya və Şimali Makedoniya ilə qarşılaşacaq.

AÇ-2020-yə ev sahibliyi edəcək şəhərlər arasında Bakı da var. Təqvimə əsasən, Bakı Olimpiya Stadionu A qrupunun İsveçrə – Uels, Türkiyə – Uels və Türkiyə – İsveçrə qarşılaşmalarına, eləcə də 1/4 final mərhələsinin bir oyununa ev sahibliyi edəcək.