UEFA İngiltərə klubunu cərimələyib

“Kristal Pelas”ın azarkeşləri UEFA Konfrans Liqasında “Fredrikstad”a (1:0) qarşı oyunda “UEFA-mafiya” yazılı banner qaldırıblar.

Komanda.az xarici KİV-ə istinadən xəbər verir ki, bu addım klub üçün cərimə ilə nəticələnib.

İngiltərə komandası ötən mövsüm Avropa Liqasına vəsiqə qazanmışdı, ancaq UEFA-nın çoxlu klub sahibi olanlara dair qaydaları səbəbindən Konfrans Liqasına yönləndirildi. İyuna qədər “Kristal Pelas” və Avropa Liqasına düşən “Lion”un sahibi eyni şəxs – Con Tekstor idi.

UEFA-nın qaydalarına əsasən, rəhbər orqanı təhqir etdikləri və idman tədbiri qaydalarına uyğun olmayan məlumat yaydıqları üçün klub 10 min avro cərimələnib.

UEFA prezidenti Aleksander Çeferin bu qərarı şərh edərək, “Kristal Pelas” azarkeşlərinə görə üzüldüyünü bildirib:

“Eyni sahibləri olan klubların iştirakı qadağandır, bu, investorlardan futbolu çıxarmaq və etimadın itirilməsi ilə əlaqədardır. “Kristal Pelas” azarkeşlərinə görə üzülürəm, amma bu, UEFA-nın günahı deyil”.