Rəcəbov İddiaçılar Turnirində ikinci məğlubiyyətinə üzüldü

Azərbaycan şahmatçısı Teymur Rəcəbov İspaniyanın paytaxtı Madriddə təşkil olunan İddiaçılar Turnirində bu gün növbəti görüşünü keçirib.

Komanda.az xəbər verir ki, 35 yaşlı qrossmeyster 7-ci turda qara fiqurlarla ABŞ təmsilçisi Fabiano Karuana ilə üz-üzə gəlib. Matç 56-cı gedişdə rəqibin qələbəsi ilə yekunlaşıb. Bu, Rəcəbovun turnirdə ikinci məğlubiyyəti olub. O, 2-ci turda ABŞ-ın digər təmsilçisi Hikaru Nakamuraya da uduzmuşdu.

Azərbaycanlı şahmatçı hazırda 2,5 xalla turnir cədvəlinin 7-ci pilləsində qərarlaşıb. Lider 5,5 xala sahib Yan Nepomnyaşidir.

Dairəvi sistem üzrə keçirilən yarış 14 turdan ibarət olacaq. Şahmatçılar bir-biri ilə iki dəfə (ağ və qara fiqurlarla) qarşılaşacaqlar. Turnirin qalibi dünya şahmat tacı uğrunda norveçli Maqnus Karlsenlə görüşə vəsiqə qazanacaq.

İddiaçılar Turniri, 7-ci tur

25 iyun

Fabiano Karuana (ABŞ) – Teymur Rəcəbov (Azərbaycan) 1:0
Rixard Rapport (Macarıstan) – Yan Nepomnyaşi (FİDE) 0:1
Dinq Liren (Çin) – Alireza Firuzca (Fransa) 0,5:0,5
Yan-Kşiştof Duda (Polşa) – Hikaru Nakamura (ABŞ) 0,5;0,5

Xal durumu: Nepomnyaşi – 5,5, Karuana – 5, Nakamura – 3,5, Rapport, Liren, Duda – 3, Rəcəbov, Firuzca – 2,5