Taleyi 6 oyuna bağlı olan Ayxan Abbasov – Rəhbərlik istefasını düşünür

“Turan Tovuz”da baş məşqçi dəyişikliyi ola bilər.

Komanda.az-ın əldə etdiyi məlumata görə, Tovuz klubunun rəhbərliyi komandanın son dövrlərdəki nəticələrindən və oyunundan razı deyil. Tovuzlular bu gün Azərbaycan kubokunun yarımfinalının cavab oyununda “Neftçi”yə uduzub, mübarizəni dayandırsa, baş məşqçi Ayxan Abbasovun “kreslo”su əməlli-başlı laxlayacaq. Amma Abbasovun taleyinə təkcə bir oyun aydınlıq gətirməyəcək. Premyer Liqada mövsümün qalan 5 matçındakı nəticələr də uğursuz olarsa, klub rəhbərliyi Ayxan Abbasovla vidalaşacaq.

Tovuz klubunun rəhbərliyini narazı salan qış fasiləsindən sonra komandanın demək olar ki, qələbə üzünə həsrət qalmasıdır. Üstəlik, Tovuzda xeyli azarkeş də Ayxan Abbasovun istefaya göndərilməli olduğunu düşünür. Artıq bəzi oyunlarda bir dəstə azarkeş baş məşqçini istefaya səsləməklə, bu istəyini aydın şəkildə göstərib.

Bir sözlə, Ayxan Abbasovun taleyi qarşıdakı 6 matçdan (biri kubok, beşi çempionat) asılıdır.

“Turan Tovuz” Premyer Liqada 31 turdan sonra 29 xalla turnir cədvəlinin 6-cı pilləsində qərarlaşıb.