“Təkcə “Liverpul” deyil, həm də “Real” qazandı” – Kapello

“Real”ın sabiq baş məşqçisi Fabio Kapello, Çempionlar Liqasının yarımfinalında “Liverpul”un “Barselona”nı məğlub etdiyi oyundan sonra fikirlərini bildirib.

Komanda.az xəbər verir ki, Kapello, İtaliya mətbuatına açıqlamasında “Liverpul”un 4:0 hesablı qələbəsiylə bitən görüşü belə şərh edib:

“Liverpul”un gücü və istəyi hər zaman yüksək səviyyədə olur. “Barselona”lılar Alisson Bekkerlə üç dəfə qarşılaşdı və Alisson üçündə də inanılmaz seyvlər etdi.

“Liverpul”un 4-cü qolundan sonra “Barselona”nın futbolçularının diqqəti yayındı. Bu qarşılaşmada təkcə “Liverpul” deyil, həm də “Real” qazandı. Çünki “Real”lılar istəməzdilər ki, Çempionlar Liqasının kubokunu “Barselona” məhz onların şəhərində, Madriddə qazansın”.