“Sumqayıt”ın 41 yaşlı rəqibi

“Sumqayıt” Avropa Liqasının 1-ci təsnifat mərhələsində Şimali Makedoniyanın “Şkendiya” kollektivi ilə üz-üzə gələcək.

Komanda.az xəbər verir ki, Tetovo şəhərini təmsil edən komanda 1979-cu ildə təsis olunub.

41 yaşlı klubun əsas rəngləri qara-qırmızıdır. “Şkendiya” ev oyunlarını 15000 tamaşaçı tutumuna malik olan digər adı “Ekoloq Arena” olan Tetovo şəhər stadionunda keçirir.

UEFA-nın klub reytinqində 150-ci pillədə qərarlaşan komandanı 50 yaşlı albaniyalı mütəxəssis Ernest Qyoka çalışdırır. 3 dəfə Şimali Makedoniya çempionu (2010/11, 2017/18, 2018/19) və 2 dəfə ölkə kubokuna (2015/16, 2017/18) sahib olan tetovolular ötən mövsüm 23 oyunda 10 qələbə, 5 heç-heçə və 8 məğlubiyyətlik nəticə göstərib. Ümumilikdə 35 xal toplayan kollektiv mövsümü 3-cü pillədə başa vurub. Komandanın 32 yaşlı yarımmüdafiəçisi Armend Alimi 9 qolla çempionatın ikinci bombardiri olub. Alimi Şimali Makedoniya millisində 13 oyunda meydana çıxıb.

Qeyd edək ki, “Şkendiya”nın heyətində Şimali Makedoniya millisinin 2 futbolçusu – Eqzon Beytulay və Lyupço Doryev çıxış edir.