“Dünyanın ən yaxşı komandalarından birinə qarşı mübarizə aparacağıq”

“Atletiko”nun baş məşqçisi Dieqo Simeone Çempionlar Liqasının 1/8 final mərhələsində “Mançester Yunayted”lə oyundan əvvəl mətbuat konfransında iştirak edib.

Komanda.az UEFA-nın rəsmi saytına istinadən xəbər verir ki, argentinalı mütəxəssis dünyanın ən yaxşı komandalarından birinə qarşı oynayacaqlarını bildirib:

“Dünyanın ən yaxşı komandalarından birinə qarşı mübarizə aparacağıq. Yeni baş məşqçinin gəlişindən sonra “Mançester Yunayted” daha etibarlı, daha fədakar futbol oynayır. Ümumiyyətlə, həmişə olduğu kimi, “Mançester Yunayted” orta sahədə və hücumda cəsarətli komandadır. “Mançester Yunayted” indi daha güclü və daha etibarlı komanda təsiri bağışlayır. Biz isə həmişə rəqiblərlə oyunlara yüksək səviyyədə hazırlaşırıq və onlara problem yaratmağın yollarını axtarırıq”.

Bu gün keçiriləcək “Atletiko” – “Mançester Yunayted” matçı saat 00.00-da start götürəcək.