Santuş: “Ola bilsin ki, sabah bəzi dəyişikliklər edək”

Azərbaycan millisi sabah UEFA Millətlər Liqasının son turunda səfərdə İsveç yığması ilə qarşılaşacaq.

Komanda.az xəbər verir ki, Azərbaycan millisinin baş məşqçisi Fernandu Santuşun oyundan əvvəl mətbuat konfransı keçirilib. Portuqaliyalı çalışdırıcı bu yolla davam edib, yaxşı komanda yaradacaqlarını bildirib:

“Əlbəttə ki, istəyirik güclü heyət quraq, qələbələr qazanaq. Mahir Emrelinin də bildirdiyi kimi, oyunumuzda irəliləyiş var və biz bu yolla davam edib, yaxşı komanda yaradacağıq.

Taktika o qədər də vacib deyil, əsas olan fəlsəfədir. Fəlsəfə çox önəmlidir, buna baxmayaraq, ola bilsin ki, taktiki baxımından dəyişiklik olsun. Rəqib komanda da bu oyuna ciddi yanaşır, onların da heyətini təhlil edib matça çıxacağıq. Düşünmürəm ki, ancaq müdafiədən oyunu quraq.

Bir komanda milli səviyyəsində inkişaf etməlidir, klub kimi deyil ki, futbolçular daim bir yerdə olsunlar, məşq etsinlər. Buna görə də, gənclərin oynaması mərhələ-mərhələ həyata keçirilməlidir. Ola bilsin ki, sabah bəzi dəyişikliklər edək. İsveç millisi Estoniya yığmasına nisbətdə daha güclü kollektivdir, ona görə də, müəyyən alternativ variantlardan istifadə edib, yaxşı nəticə qazanmağa çalışacağıq”.

İsveç – Azərbaycan matçı sabah saat 23:45-də start götürəcək.

Fəxri Rüstəmli