Salah ona “eqoist” deyən sabiq futbolçunun cavabını verdi

“Liverpul”un hücumçusu Məhəmməd Salah “Mançester Yunayted”lə Premyer Liqanın 20-ci tur matçından (2:2) sonra keçmiş futbolçu, hazırda “Sky Sports”un eksperti və teleaparıcısı olan Cimi Karragerin sözlərinə cavab verib.

Komanda.az “Sky Sports”-a istinadən xəbər verir ki, ingiltərəli keçmiş futbolçu, Salahın eqoist olduğunu bildirərək bunları deyib:

“Deyərdim ki, Vircil van Dayk klubun kapitanı kimi bu vəziyyətdən özünə böyük hörmətlə çıxıb. Onun özünü aparma tərzi, meydandakı çıxışı, komandanı necə idarə etməsi göz önündədir. Trent Aleksander-Arnold və ya Salah haqqında danışmaq əvəzinə, yəqin ki, ona hörmət etmək istərdim. Van Dayk özünü əsl lider kimi göstərdi. Müqaviləni imzalamağa əli gəldi. Digər ikisi bəlkə də, niderlandlı oyunçuya baxıb nümunə götürə bilərdi. Məsələn, Salah oyuna çox da qarışmırdı, o, eqoistdir”.

Misirli forvard sosial şəbəkə hesabındakı paylaşımında Karragerə cavab verərək, qısaca bunu deyib:

“Sən mənimlə məşğulsan!”

Salah, Van Dayk və Aleksander-Arnoldun “Liverpul”la müqavilələri bu mövsümün sonunda başa çatacaq.