“Sabah”la xorvatlar arasında imzalanan müqavilənin DETALLARI

“Sabah”ın Xorvatiyanın “Dinamo” (Zaqreb) klubu ilə əməkdaşlıq müqaviləsi imzaladığını xəbər vermişdik.

Komanda.az klubun saytına istinadən xəbər verir ki, sözügedən müqavilənin detalları məlum olub. Klublar arasında imzalanmış müqaviləyə əsasən, “Sabah” Futbol Akademiyasının və “Vətən” Futbol Məktəbinin sistemini “Dinamo” Futbol Akademiyası müəyyənləşdirəcək. Məhz Zaqreb təmsilçisinin akademiyasından cəlb olunmuş mütəxəssislər “Sabah”da yeni, Avropa standartlarına uyğun sistemin formalaşmasını təşkil edəcəklər.

“Sabah” və “Dinamo” arasında əməkdaşlıq bir neçə istiqaməti əhatə edəcək. Onlardan bəziləri aşağıdakılardır:

• “Dinamo” Futbol Akademiyasının mütəxəssisi Adino Mustedanaqiç klubun futbol məktəbinin koordinatoru olacaq. O, yeni sistemin akademiyada tətbiq edilməsinə birbaşa nəzarət edəcək.
• Mustedanaqiçlə yanaşı, fiziki hazırlıq üzrə mütəxəssis və bir məşqçi ilə 3 illik müqavilə bağlanacaq. Hər 3 mütəxəssis bu müddət ərzində ölkəmizdə yaşayaraq, akademiyada daimi fəaliyyət göstərəcəklər.
• Əməkdaşlıq çərçivəsində “Dinamo” FA-nın məşqçilərinin akademiyada çalışması, öz biliklərini yerli məşqçilərlə paylaşması planlaşdırılır.
• Akademiyanın uşaqları “Dinamo” FA-da təcrübə keçmək fürsəti qazanacaqlar.
• “Sabah”ın aşağı yaş qrupları “Dinamo”nun təşkil etdiyi nüfuzlu turnirlərdə iştirak etmək imkanı əldə edəcəklər.
• “Dinamo” FA-nın sistemi tədricən “Sabah” FA və “Vətən” FM-a  tətbiq ediləcək.

“Dinamo”nun ev oyunlarını keçirdiyi “Maksimir” stadionunda gerçəkləşən tədbirdə Azərbaycanın Xorvatiyadakı səfiri Fəxrəddin Qurbanov, “Sabah” FK-nın prezidenti Maqsud Adıgözəlov, klubun seleksiya qrupunun rəhbəri İlqar İsrafilov, “Dinamo” klubunun prezidenti Mirko Barişiç, idarə heyətinin sədri Vlatka Peras, idarə heyətinin üzvü Amra Peternal, futbol məktəbinin direktoru Damir Krznar və onun köməkçisi Andelko İvanjko iştirak edib.