“Renduliçə öz oyun sistemini tətbiq etmək üçün vaxt lazımdır” – MÜSAHİBƏ

“Sabah”ın serbiyalı müdafiəçisi Boyan Letiçin Komanda.az saytına müsahibəsi:

• Komandanız son iki oyunda uduzur. Nə baş verir?

• Əlbəttə, ardıcıl iki matçda məğlub olmağımız xoş deyil. Yeni məşqçinin gəlişi ilə oyun sistemində dəyişiklik oldu. Buna uyğunlaşmaq üçün müəyyən vaxt lazımdır. İnanıram ki, tezliklə müsbət nəticələrlə azarkeşlərimizi sevindirəcəyik.

• Bildiyimizə görə “Sabah”la müqaviləniz bu mövsümün sonunda başa çatacaq. Klubla yeni müqavilə ilə bağlı hansısa danışıqlar olubmu? Ümumiyyətlə, özünüz “Sabah”da qalmaq istəyirsinizmi?

• Sadəcə onu deyə bilərəm ki, burada oynamaq, “Sabah”ın üzvü olmaq mənim üçün xoşdur. İndi yalnız komandanın uğurları, növbəti matçlar barədə düşünürəm.

• Rəhbərlik bu mövsüm qarşınıza hansı hədəfləri qoyub?

• Mənim əsas hədəfim və istəyim “Sabah”la yenidən avrokuboklara vəsiqə qazanmaqdır. İnanıram ki, buna nail olacağıq.

• Hazırda turnir cədvəlində 4-cü yerdəki “Sumqayıt”dan üç xal geri qalırsız. Avrokuboklara vəsiqə qazanmamaq sizin üçün böyük uğursuzluq sayılarmı?

• Əlbəttə, mən də məhz belə düşünürəm.

• Yeni baş məşqçiniz Krunoslav Renduliçin oyun sisteminə uyğunlaşmaq çətin deyil?

• İki il tətbiq edilən oyun sistemindən fərqli sistemə keçid o qədər də asan deyil. Buna görə, məncə, Renduliçə öz oyun sistemini tətbiq etmək üçün vaxt lazımdır. İnanıram ki, onunla birlikdə yaxşı nəticələrə imza atacağıq.

• Deyə bilərsiz Renduliçin əvvəlki baş məşqçiniz Murad Musayevlə əsas fərqi nədir?

• Məşqçiləri müqayisə etmək istəməzdim. Hər mütəxəssisin öz baxışı, öz üslubu var.

• Artıq iki ildir ki, Azərbaycandasız. Azərbaycan futboluyla bağlı düşüncələriniz maraqlı olar.

• Azərbaycan futbolu haqqında müsbət fikirdəyəm. Keyfiyyətli oyunçular çoxdur, infrastruktur və məşq şəraiti yaxşıdır, futbola çox sərmayə qoyulur və ümid edirəm ki, daha da yaxşılaşacaq.

• Son vaxtlar hakimlik çox tənqid və müzakirə olunur.  Siz də azərbaycanlı hakimlərin işindən narazısız?

• Tam razı qaldığımı deyə bilmərəm. Düşünürəm ki, bəzi oyunlarımızda idarəçilik heç də yaxşı olmamışdı.

• Bu mövsüm keçirdiyiniz oyunlardan hansı daha çox yadınızda qalıb?

• Bir çox oyunu fərqləndirə bilərəm. Amma daha çox avrokubok oyunlarımızı və “Neftçi”yə son dəqiqə qoluyla qalib gəldiyimiz oyunu qeyd edə biərəm.

Fəxri Rüstəmli