“Belə qərar qəbul olunsa, bizim üçün pis olacaq” – Müsahibə

04/09/2020 | 15:45

“Sabah”ın futbolçusu Mario Marinanın Komanda.az saytına müsahibəsi:

Mario, karantin vəziyyətində nə edirsiz, günləriniz necə keçir?
Vaxtımın çoxunu filmlərə və seriallara baxaraq keçirirəm. Və fitness məşqçimizin bizə verdiyi tapşırıqları edirəm.
Artıq üç həftədən çoxdur ki, futbolsuz qalmısız, çətin deyil?
Əlbəttə, çətindir. Ancaq bu vəziyyətdə bizə deyilənlərə qulaq asmalı, onları etməliyik.
Mövsümün bərpa olunmaması ehtimalı var. Belə qərar çıxsa, reaksiyanız necə olacaq?
Verilən qərara hörmətlə yanaşacam.
Avropanın bəzi klublarında futbolçular məvaciblərinin azaldılmasına razı olur, bəziləri də vəziyyətlə bağlı olan qeyri-müəyyənliyə görə maaşlarının azaldılmasını istəmir. Siz necə düşünürsüz?
Bu, çox şəxsidir və bu haqda danışmaq çətindir. Futbolçularla klub arasında olan normal müzakirələrdən sonra verilən qərarlarda problem olmamalıdır.
Mövsüm bərpa olunacağı halda, formanızı yığmaq çətin olmayacaq ki?
O qədər də çətin olmaz. Bəlkə, bir neçə həftə lazım oldu.
Premyer Liqada mövsüm bitirilsə, çempionatı 6-cı yerdə tamamlayacaqsız. Bununla razılaşacaqsız?
Dördüncü sırada olan – hansı ki, bu komanda Avropaya gedə bilər – onunla aramızda 2 xal fərq var. Belə qərar qəbul olunsa, bizim üçün pis olacaq.
Artıq 4 aydır ki, Azərbaycandasız. Ölkəmiz haqda təəssüratlarınız necədir?
Hazırda təəssüratlarım çox yaxşıdır. Bakı gözəl şəhərdir və yaşamaq üçün əla yerdir.
Uzun illər Xorvatiyada top qovmusuz. İki ölkə futbolu arasında hansı fərqlər var?
Ən böyük fərq taktika baxımındandır.
“Sabah” Xorvatiyanın yüksək liqasında hansı yer uğrunda mübarizə aparardı?
Düşündürücü sualdır. Məncə, elə buradakı kimi olardı.
Xorvatiyada koronavirusa yoluxanların və ölənlərin sayı Azərbaycanla nisbətdə çoxdur. Orda vəziyyət necədir?
Xorvatiyada vəziyyət çox ölkədən yaxşıdır. Hökumət fantastik iş görür.
Ordakı qohumlarınızla əlaqə saxlayırsızmı?
Bəli, danışıram. Onlarla hər gün əlaqə saxlayıram. Sağlamdırlar və ümid edirəm ki, belə də qalacaqlar.