Kamran Quliyev niyə susur?

Rəşad Ergün

“Neftçi” klubunun prezidenti (ya da sənədlərdə göstərildiyi kimi, futbolçusu) Kamran Quliyevlə bağlı dünən Komanda.az saytında gedən yazı Azərbaycanda futbolun kimlər tərəfindən və necə idarə olunduğuna aid ən yaxşı nümunələrdən biridir. Adam klub prezidentidir, amma bir çox yerlərdə futbolçu kimi göstərilib. Maaşı da aylıq 10 min 105 manat. Yaxınlarda bir siyahıya rastladım, hətta SOCAR-ın prezidentinin aylıq maaşı 10 min manatdan çox deyil (8 min manata yaxın). Kamran Quliyev bu boyda məvacibi hansı xidmətlərinə görə alır? Niyə klub prezidenti postunda oturduğu halda futbolçu kimi göstərilir? Klubun mətbuat xidmətindən əvvəlcə xəbəri yalanlamağa çalışdılar, sonra “sorğu göndərin” dedilər. Sorğu göndərdik, cavablamadılar. Kamran Quliyev özü isə zəngə cavab vermədi.

Elxan Məmmədov və onun Azərbaycan futbolunda vacib, pullu postlara gətirdiyi kadrlarının ilk gündən taktikası budur: talamaq, soymaq və reaksiya verməmək. Kamran Quliyevin hər ay qatlayıb cibinə qoyduğu 10 min manatdan çox pul Azərbaycan vətəndaşlarına məxsus pullardır. Şəhid ailələrinə, qazilərə verilməli olan pullardır. Yaxın bir qohumumun ikinci Qarabağ müharibəsində mina partlamasından sonra dişləri zərər görmüşdü. Gedib öz cibinin puluna dişlərini müalicə etdirməli oldu. Niyə görə? Kamran Quliyev kimilər daha çox varlansın, daha çox talasın deyə?

P.S. Kamran Quliyevlə bağlı məlumatlara görə sənəd, konkret sübut istəyən yoldaşların nəzərinə, sənəd də var, sübut da (çox maraqlı olan bəzi dostlara göstərmişik də). Amma klub və onun prezident, yoxsa futbolçu olduğu bəlli olmayan Kamran Quliyevi haqqında çıxan məlumata, mətbuatda, sosial şəbəkədə gündəm olan mövzuya reaksiya vermirsə, özünüz düşünün… Sizin haqqınızda kimsə nəsə yazanda, ictimai müzakirəyə çıxaranda susub oturarsızmı? Qoy “Neftçi” sübut etsin ki, Kamran Quliyev doğrudan da klub prezidentidir və məvacibi 10105 manat deyil.