“Bütün futbolçularımız məsuliyyəti dərk edir və…” – “Arsenal”ın kapitanı

Rusiyanın “Arsenal” klubunun futbolçusu Kirill Kombarov Avropa Liqasının 2-ci təsnifat mərhələsinin “Neftçi” ilə ilk oyunundan əvvəl təşkil olunan mətbuat konfransında iştirak edib.

Komanda.az xəbər verir ki, Tula təmsilçisinin kapitanı media nümayəndələri ilə görüşdə bunları deyib:

“Neftçi” yaxşı komandadır. Moldova təmsilçisini məğlub etdilər, ancaq indi hamı futbol oynayır. 6 qolun vurulması isə yaxşı göstəricidir. Onların legionerləri çoxdur, mütəmadi olaraq avrokuboklarda iştirak edirlər.

Belə oyunların xüsusiləşdirilməsinə ehtiyac yoxdur. Bu, “Arsenal” üçün tarixi hadisədir. Düşünürəm ki, bütün futbolçularımız məsuliyyəti dərk edir və oyunda 100 faizlərini verməyə hazırdırlar.

Burdakı və Bakıdakı oyunlar asan keçməyəcək. İlk oyunu evdə keçirirsənsə, qol buraxmamalısan. Qol vurub, qapımızı toxunulmaz saxlasaq, səfər matçı daha asan olacaq”.

“Arsenal” – “Neftçi” matçı bu gün, saat 21:00-da start götürəcək.