Rusiya millisinin növbəti yoldaşlıq matçının yeri və vaxtı bilindi

Futbol üzrə Rusiya millisi İran yığması ilə qarşılaşacaq.

Komanda.az xəbər verir ki, bu barədə İran Futbol Federasiyasının ictimaiyyətlə əlaqələr üzrə direktoru Əmir Mehdi Əllavi məlumat verib.

Qarşılaşma martın 23-də, Tehranda keçiriləcək.

Məlumatda bildirilir ki, ölkələrin futbol federasiyaları arasında əməkdaşlıq memorandumu imzalanıb.

2022-ci ildə Rusiya millisi üç yoldaşlıq oyunu keçirib. Ruslar Qırğızıstanı (2:1) məğlub edib, Tacikistan (0:0) və Özbəkistanla (0:0) bərabərə qalıblar.

2022-ci ilin fevralında FİFA və UEFA Rusiyanın Ukraynaya təcavüzkar hücumundan sonra bu ölkənin klublarını və milli komandalarını himayəsində olan bütün yarışlardan uzaqlaşdırıb.