Keçmiş futbolçu Ronaldonu “yıxıb-sürüdü”

“Liverpul”un və “Bayern”in sabiq yarımmüdafiəçisi Ditmar Hamann Portuqaliya millisinin hücumçusu Kriştiano Ronaldonu AÇ-2024-ün 1/8 finalında Sloveniya ilə oyunda davranışına görə tənqid edib.

Komanda.az “Daily Mail”-ə istinadən xəbər verir ki, almaniyalı keçmiş futbolçu, Ronaldonun ancaq özü haqda düşündüyünü bildirib:

“39 yaşlı futbolçu 120 dəqiqə oynayır və penaltini yerinə yetirmir. Deməliyəm ki, Ronaldonun komanda oyunçusu olduğuna inanırdım, çünki onun komandaya həmişəkindən daha çox ehtiyacı var. İnanırdım, amma düşünürəm ki, bu gün o, əsl üzünü göstərdi. Penaltini qaçırır, sonra ağlamağa başlayır. Və düşünürəm: Hər şey sənin ətrafında fırlanır? Bir komandada 26 oyunçu, 20 məşqçi, tribunada 30 və ya 40 min azarkeş var. Hər şey sənin ətrafında dönmür. Mən obyektiv olmağa çalışıram, amma Sloveniyaya azarkeşlik edirdim, çünki reaksiyanın utancverici olduğunu düşünürdüm. Mən heç vaxt belə bir şey görməmişəm, emosiyaya düşən kimi son olur.

Ronaldo penalti seriyasında penaltini vurdu və o, bunu yaxşı bacardı. Amma dediyim kimi, onun komanda oyunçusu olması ilə bağlı bütün cəfəngiyatlara inanırdım. Bu, tamamilə yalandır! O, ancaq özü haqqında düşünür”.

Ronaldo əlavə vaxtda penaltini qola çevirə bilməyib. 39 yaşlı hücumçunun zərbəsini qapıçı Yan Oblak dəf edib. Portuqaliya yığması penaltilər seriyasında 3:0 hesabı ilə qalib gələrək, Sloveniyadan daha dəqiq olub. Roberto Martinesin komandası 1/4 finalda Fransa ilə qarşılaşacaq.