Ronaldodan Vinisiusa dəstək: “Artıq yetər!”

Braziliya millisinin sabiq futbolçusu Ronaldo Nazario irqçi çıxışlara məruz qalan “Real”ın hücumçusu Vinisius Juniora dəstək olub.

Komanda.az “Madrid Xtra”-ya istinadən xəbər verir ki, o, irqçilik edən şəxslərin cəzalandırılması məsələsini diqqətə çatdırıb:

“Daha bir irqçilik hadisəsi. Günahkarlar cəzalandırılmayana qədər heç bir dəyişiklik olmayacaq. Bu məsələdə həmin insanları məsuliyyətə cəlb etmək lazımdır.

Artıq yetər! Vinisius, bu mübarizədə mənə güvənə və arxalana bilərsən!”

Xatırladaq ki, İspaniya La Liqasının 35-ci turunda “Valensiya” ilə matçda (1:0) təhqirlərə məruz qalan “Real”ın braziliyalı futbolçusu görüşün sonunda qırmızı vərəqə alıb. O, meydançanı vaxtından öncə tərk edib.

“Sambaçı” cari mövsümdə “kral klubu”nun heyətində bütün turnirlər daxil olmaqla 54 oyuna çıxıb, 23 qol vurub və 21 məhsuldar ötürmə edib.

“Real” hazırda La Liqanın turnir cədvəlində 71 xalla 3-cü, “Valensiya” isə 40 xalla 13-cü pillədə qərarlaşıb.