“Səudiyyə Ərəbistanı liqası Portuqaliyadan daha yaxşıdır” – Ronaldo

“Əl-Nəsr”in hücumçusu Kriştiano Ronaldo Səudiyyə Ərəbistanı çempionatının inkişafı haqda danışıb.

Komanda.az AS-a istinadən xəbər verir ki, 38 yaşlı portuqaliyalı futbolçu bu inkişafda böyük payı olduğunu bildirib:

“Kim tənqid olunmur? Problemlər hər yerdədir. Amma bilirdim ki, belə olacaq. İnsanlar məni bir az dəli hesab edirdilər, ancaq hər şey çox dəyişdi. Səudiyyə Ərəbistanına yaxşı oyunçuların gəldiyini görməkdən xoşbəxtəm və qürur duyuram. Mən bu işdə qabaqcıl olmuşam və bundan məmnunam. Ümid edirəm ki, çempionat bundan sonra da inkişaf edəcək və zirvələrdə qalacaq.

Portuqaliya çempionatındakı mübahisələr məni təəccübləndirmir. Həmişə və hər yerdə mübahisələr var, amma Portuqaliyada həqiqətən çox var. Ümid edirəm ki, bu, dəyişəcək, çünki biz futbol haqqında çox az danışırıq. Bu yaxınlarda qəzeti açdım və oxuduğum ilk üç şey futbolla bağlı deyildi. Bu gün ən vacib şey pis xəbərlərdir.

Səudiyyə Ərəbistanı liqasının Portuqaliyadan daha yaxşı olduğuna ürəkdən inanıram. Daha çox böyük oyunçu, daha az mübahisə və daha çox futbol var”.

Ronaldo 2023-cü ilin yanvarında Səudiyyə Ərəbistanına köçüb və “Əl-Nəsr”lə 2025-ci ilə qədər nəzərdə tutulan müqavilə imzalayıb.