“Ronaldo bu meydanda əzəli rəqibinə qarşı yaxşı oyun göstərmək üçün çox motivasiyalı idi”

UEFA Çempionlar Liqasının qrup mərhələsinin sonuncu turu çərçivəsində “Barselona”ya 3:0 hesabı ilə qalib gələn “Yuventus”un baş məşqçisi Andrea Pirlo açıqlama verib.

Komanda.az İtaliya mətbuatına istinadən xəbər verir ki, “qoca sinyora”nın oyunundan razı qaldığını bildirən Pirlo, matçda iki qol vuran Kriştiano Ronaldonun çıxışına da toxunub:

“Uğurlu seriyamızı davam etdirməyimiz çox vacib idi. Oyuna bu cür köklənəndə, qərarlı çıxış edəndə, komandanın səviyyəsi ortaya çıxır. Taktiki planımız işə yaradı. Qarşımızda çox oyun var. Çempionlar Liqasına köklənmək asandır, A Seriyasını unutmamalıyıq. Çempionatda da belə motivasiyalı və aqressiv oynamalıyıq.

Ronaldo bu meydanda əzəli rəqibinə qarşı yaxşı oyun göstərmək üçün çox motivasiyalı idi. Belə motivasiyadan sonra hər şey daha sadə görünür”.