Ramon Maçado: “Bu, məni ikiqat xoşbəxt edir”

“Neftçi”nin hücumçusu Ramon Maçado paytaxt klubunda qol hesabını açıb.

Komanda.az xəbər verir ki, braziliyalı futbolçu Azərbaycan Premyer Liqasının 4-cü turu çərçivəsində “Keşlə”yə 3:0 hesabıyla qalib gəldikləri matçda fərqlənib.

Maçado qol hesabını açmağın sevincini klubun rəsmi saytı ilə bölüşüb. O, qollarını sıralamaq üçün öz üzərində daha çox çalışacağını deyib:

“Ağ-qara formada meydana çıxdığım ikinci oyunda qol hesabımı açdığım üçün çox xoşbəxtəm. Bu qolun komandamın qələbəsində rol oynaması məni ikiqat xoşbəxt edir. Qolları sıralamaq üçün öz üzərimdə daha çox çalışacağam. Təkcə qollarımla deyil, oyunumla, ötürmələrimlə də faydalı olmaq istəyirəm. Komandamızın imza atdığı 3-cü qol epizodunda mən də fərqlənə bilərdim, amma həmin an daha əlverişli mövqedə olan Mirabdullaya ötürmə verdim. Nəticədə top rəqib futbolçudan İsmayıla qayıtdı ki, o da topu qapıdan keçirdi”.