“O, Poqba qədər güclü, Vidal qədər cəsarətli və Markizio qədər dinamikdir” – Buffon

İtaliyalı futbolçu Canluici Buffon PSJ-dəki keçmiş komanda yoldaşı Adrien Rabiot haqqında açıqlama verib.

Komanda.az İtaliya mətbuatına istinadən xəbər verir ki, 41 yaşlı qapıçı, adı “Yuventus” la yanaşı çəkilən fransalı futbolçunun səviyyəsi haqqında danışıb:

“Rabiot möhtəşəm bacarıqlara sahib olan mükəmməl futbolçudur. O, eyni zamanda, çox yaxşı komanda yoldaşıdır. Bəzən mətbuatda yayılan xəbərlər hardan çıxır, bilmirəm, amma Rabiot dünya səviyyəli yarımmüdafiəçidir. O, Pol Poqba qədər güclü, Arturo Vidal qədər cəsarətli və Klaudio Markizio qədər dinamikdir”.

İtaliyalı qapıçı Rabiotun çatışmayan cəhətləri haqqında da danışıb:

“Düşünürəm ki, o, cərimə meydançasında daha çox iş görməyə çalışmalıdır. Cərimə meydançasına daha çox daxil olarsa, hər mövsüm azı 10 qol vura bilər”.

PSJ ilə müqaviləsi iyunun 30-na qədər olan Rabiotun Paris klubundan ayrılacağı gözlənilir.