“Rəşad Əhmədov hisslərimizlə oynayır” – Azər Bağırov

“Araz-Naxçıvan”ın baş məşqçisi Azər Bağırov Azərbaycan Premyer Liqasının 26-cı turunun “Turan Tovuz”la səfər matçından sonra fikirlərini bölüşüb.

Komanda.az xəbər verir ki, o, 0:2 hesabıyla uduzduqları matçdan sonra keçirilmiş mətbuat konfransında bunları söyləyib:

“Maraqlı oyun oldu. Bir şeyi bilmək lazımdır ki, tək futbol yox, həm də hakimlərə qarşı oynamalıyıq. Hər dəfə bizə qarşı eyni hallar təkrarlanır. Futbolçular da insandır, onlar da əsəbləşir. Hər şey bizim əleyhimizədir.

Mövsümün əvvvəlində “Turan Tovuz”, “Zirə” hakimlərlə bağlı danışdı. Amma biz susduq. VAR əsas hakimi çağırır. Çağırıbsa, deməli nəsə var. Amma baş hakim öz bildiyini edir. Yəqin ki, həmin hakimin qarşısına Allahın ədaləti çıxacaq.

Keçən dəfə dedik ki, Rəşad Əhmədov komandamızı çökdürür. Skamyada oturan 20 yaşlı uşaq da dözə bilmir. Bu qədər hakimlər var. Rəşadı başqa oyuna göndərsinlər. Hisslərimizlə oynayır. Rəşadı görəndə artıq bilirəm ki, məğlub olmuşuq. Bir oyun deyil, “Sabah”la matçda VAR-da oturmuşdu, bu gün əsas hakim idi. Başqa planlarınız varsa, deyin. Komanda futbol oynayır. Cərimə meydançasında futbolçumuzu dirsəklə vururlar, qardaşoğlu susur. Biz necə oynayaq? Deyin, işimizi bilək. VAR çağırır, Rəşad deyir ki, baxdım heç nə yoxdur. Məni sındırmaq üçün gəlirsə, heç nə demirəm. Sağolsunlar, yollarına davam etsinlər.

Tək Azər Bağırova qarşı qərəz yoxdur. Mən hamının hörmətini saxlamışam. Sadəcə, “Araz-Naxçıvan” yuxarıda ola bilməz. Mən belə görürəm. “Sabah”la oyunda Rəşad məni yıxıb-sürüyür. Yenidən bizim oyuna baş hakim kimi göndərirlər.

“Turan Tovuz”un bizim üçün arzuolunmaz rəqib olduğunu deməzdim. Əvvəlki matçlarda da pis oynamamışıq. Bu gün də komanda futbol oynadı. İlk hissədə üstünlük bizdə idi.

İstefa barədə deyiriszə, mən çox rahat adamam. Bura öz əziyyətimlə gəlmişəm. Bu gün burdayıq, sabah başqa yerdə ola bilərik. Bu, futboldur. Amma futbolçularla aramızda heç bir problem yoxdur. Biz təslim olmamışıq, sadəcə olaraq bizi tərkisilah etdilər”.