“Qəbələ”nin Türkiyədəki ilk rəqibi bəlli oldu

Türkiyənin Bolu şəhərində təlim-məşq toplanışında olan “Qəbələ” növbət mövsümə hazırlığını davam etdirir.

Komanda.az xəbər verir ki, “qırmızı-qaralar” qonşu ölkədəki hazırlıq prosesinin üçüncü gününü arxada qoyub. Komanda günü bir məşqlə başa vurub. Hazırlıq prosesi günün ikinci yarısında gerçəkləşib. Futbolçular əsasən toplu təmrinləri yerinə yetiriblər. Bərpa prosesi davam edən Rasim Ramaldanov komandadan ayrı hazırlıq keçib.

Yeri gəlmişkən, “Qəbələ” sabah yoxlama oyunu keçirəcək. “Qırmızı-qaralar” Bolu şəhərində təşkil olunan təlim-məşq toplanışında ilk sınağına çıxacaq. Sənan Qurbanovun çalışdırdığı komanda qonşu ölkədəki toplanışın 4-cü günündə Ukraynanın “Mariupol” klubu ilə qarşılaşacaq. Görüş Hendek Atatürk stadionunda baş tutacaq. Qarşılaşmanın start fiti Bakı vaxtı ilə 18:30-da veriləcək.

Əsası 1960-cı ildə qoyulan Mariupol şəhərinin eyniadlı təmsilçisi 59 illik tarixi ərzində dəfələrlə adını dəyişib. “Azovstal”, “Azovets”, “Metallurq”, “Lokomotiv”, “Novator”, “İliçevets” kimi çıxış edən klub iki il öncə “Mariupol” adını alıb. Uzun illər SSRİ və Ukraynanın aşağı liqalarında mübarizə aparan komanda 1997/98 mövsümündə yüksək dəstədə debüt edib. Həmin vaxtdan fasilələrlə Premyer Liqada mübarizə aparan mariupollular 2001/02, 2005/06 və 2018/19 mövsümlərində ən yaxşı nəticəsinə imza ataraq 4-cü yeri tutub. 2000/01, 2005/06 və 2017/18 mövsümlərində Ukrayna kubokunda yarımfinala yüksələn “Mariupol” bu turnirdə daha böyük uğur qazana bilməyib. Avrokuboklarda iki mövsüm keçirən ukraynalılar bu yay yenidən UEFA Avropa Liqasında mübarizə aparacaq. Mariupol təmsilçisi yarışa 3-cü təsnifat mərhələsindən başlayacaq.

Yoxlama oyunu
7 iyul

18:30. Qəbələ – Mariupol
Hendek Atatürk stadionu