“Qəbələ” daha bir futbolçunun gedişini rəsmən açıqladı

“Qəbələ” klubu daha bir futbolçu ilə yollarını ayırıb.

Komanda.az klubun saytına istinadən xəbər verir ki, yarımmüdafiəçi Elvin Camalov növbəti mövsümdən “qırmızı-qaralar”ın formasını geyinməyəcək.

“Qəbələ” Futbol Akademiyasının yetirməsi olan 24 yaşlı futbolçu əsas komandada 2013/14 mövsümündə debüt edib. “Qırmızı-qaralar”ın heyətində 141 oyun keçirən yarımmüdafiəçi Premyer Liqada 111, Azərbaycan kubokunda 18, UEFA Avropa Liqasında 12 dəfə meydana çıxıb. Camalov “Qəbələ”nin heyətində Azərbaycan çempionatlarında iki gümüş (2016/17, 2017/18) və üç bürünc (2013/14, 2014/15, 2015/16) medal qazanıb. Yarımmüdafiəçi 2018/19 mövsümündə qalibi adını qazandığı Azərbaycan kubokunun üç dəfə – 2013/14, 2016/17 və 2017/18 finalçı olub.

“Qəbələ” bir müddət əvvəl Cavid Hüseynovla da yollarını ayırmışdı. Hüseynov “Zirə” ilə iki illik müqavilə imzalayıb.