Qurban Qurbanov: “Lion” bizdən üstün komandadır, amma…”

“Qarabağ” sabah UEFA Avropa Liqasının 5-ci turunda “Lion”la (Fransa) qarşılaşacaq.

Komanda.az xəbər verir ki, oyundan bir gün əvvəl Ağdam təmsilçisinin baş məşqçisi Qurban Qurbanovun mətbuat konfransı keçirilib. Qurbanov çox keyfiyyətli bir komandaya qarşı oynayacaqlarını bildirib:

“Çox keyfiyyətli bir komandaya qarşı oynayacayıq. Çox vacib oyundur bizim üçün. Demək olar ki, pis hazırlaşmamışıq. İnanıram ki, yaxşı çıxış edib, azarkeşlərimizi sevindirərik.

Marko Veşoviç və Mateus Silvanın hazırlığı yaxşdır. Hələlik bu gün və sabahkı məşqlərdən sonra qərar verəcəyik. Ümumi olaraq hər ikisindən razıyam. “Lion”un heyəti ilə maraqlanmışıq. Oyunlarına baxmışam, təhlil etmişəm. Bizim heyətdə demək olar ki, bəllidir. Sadəcə bir-iki mövqedə suallar var. Ona da baxacağıq.

“Lion”da maliyyə böhranına gəlincə, belə söz-söhbətlər bütün böyük komandalarda olur. Bir-iki oyunçu satıb problemlərini yoluna qoya bilərlər. Biz oyuna bu düşüncəylə yanaşa bilmərik ki, “Lion”un maliyyə problemləri var və komanda çöküb. Böyük komandalar üçün belə problemlər xırda şeylərdir. Ümumən, ilk olaraq, biz həmişə çalışmışıq ki, istənilən rəqibə qarşı öz bacardığımızı daha yaxşı nümayiş etdirək. Əlbəttə ki, hər komandanın üstün cəhətləri var. Sadəcə, bir neçə detal var ki, biz bunlara qarşı diqqətli olmalıyıq. Oyunun çox hissəsini demək olar ki, öz düşüncələrimizin üzərində qururuq. Bir rəqib haqda çox məlumat verməyi xoşlamıram. Sadəcə oyunçuların keyfiyyətli tərəflərini futbolçularıma çatdırıram. Təbii ki, “Lion” bizdən üstün komandadır, amma bizim də Avropada böyük təcrübəmiz var. Və daha çox kollektiv oyuna üstünlük verib, yaxşı nəticə qazanmağa çalışacağıq”.

Noyabrın 28-də Tofiq Bəhramov adına Respublika Stadionunda keçiriləcək “Qarabağ” – “Lion” matçı saat 21:45-də start götürəcək.

Fəxri Rüstəmli