Beqoviç “Qarabağ”a niyə keçib? – Açıqlama

“Qarabağ”ın yeni transferi Asmir Beqoviç Bosniya və Herseqovina mətbuatına açıqlama verib.

Komanda.az xəbər verir ki, 32 yaşlı qapıçı, yerli mətbuata “Qarabağ”a keçidi haqda danışıb:

“Meydana çıxmaq istəyirəm. Bu baxımdan “Qarabağ” mənim üçün ən yaxşı seçim idi. Bu komanda ənənələrinə sadiq, yerli çempionatda daim mübarizə aparan klubdur. Həmçinin, onlar beynəlxalq arenada da özlərini yaxşı tərəfdən göstərirlər. Bu mövsüm Avropa Liqasının qrup mərhələsində oynayacaqlar, seçimimin başqa bir səbəbi də budur. Yanvara qədər vacib matçlarda meydana çıxacam və bu, xeyrimə olacaq.

“Qarabağ” çox ciddi komandadır, Bakı yüksək mədəniyyətə sahib inkişaf etmiş, gözəl şəhərdir. “Qarabağ”ın Avropa Liqasında keçirdiyi oyunlara baxdım. Mənə elə gəlir ki, komanda haqqında ümumi olaraq çox şey bilirəm. Əsas odur ki, yaxşı komandada oynayacağımı dərk edirəm. Sentyabrın 5-dən “Qarabağ”a qoşulacam”.

Bosniyalı qapıçı “Qarabağ”ın Avropa Liqasının qrup mərhələsindəki şanslarını da dəyərləndirib:

“Onların “Linfild”lə matçlarını izlədim. Çətin oyun olsa da, qrup mərhələsinə vəsiqə qazana bildilər. Düşdükləri qrup elə də asan deyil. “Sevilya” haqqında danışmağa ehtiyac yoxdur, onların gücü hamıya bəllidir. APOEL Çempionlar Liqasının pley-offunda “Ayaks”a əziyyət verə bilmişdi. Və daha az təcrübəyə malik olan “Düdelanj”. Bununla belə, düşünürəm ki, “Qarabağ” bütün rəqiblərinin öhdəsindən gələ bilər”.

“Qarabağ” Asmir Beqoviçi “Bornmut”dan 4 aylıq icarəyə götürüb.