“Kimlərsə daim əsas heyətdə olacaq deyə bir şey yoxdur” – Qurban Qurbanov

“Qarabağ”ın baş məşqçisi Qurban Qurbanov ötən gün Antalyadakı təlim-məşq toplanışı çərçivəsində keçirdikləri yoxlama görüşləri barədə danışıb.

Komanda.az xəbər verir ki, 49 yaşlı mütəxəssis “Şlyonsk”a (Polşa) 2:3, “Baçka Topola”ya (Serbiya) 0:1 hesabı ilə uduzduqları matçlar haqqında klubun televiziyasına açıqlama verib. Qurbanov hər iki oyunla bağlı bunları söyləyib:

“Bu, futbolçuların yüklənməsinin sonuncu günü idi. Yaxşı rəqiblərə qarşı oynadıq. Hər iki matçda hiss olunurdu ki, rəqiblər fiziki olaraq bizdən daha hazırlıqlıdır. Oyunçular iki görüşdə 90 dəqiqə dinamik futbol oynadılar. Rəqiblər bizi buna məcbur etdi. Razı qaldığım məqam bəzi futbolçuların 90 dəqiqə meydanda olması idi. Oyunda sürət də yüksək oldu. Qarşılaşmadan sonra fiziki göstəricilərə baxdıq, bəzilərində maksimal sürət çox yuxarı idi. Buna dözdülər. Mən də bundan razı qaldım. Futbolçular qarşıdakı iki gündə yaxşı istirahət edəcəklər və bərpa məşqləri olacaq. Son yoxlama görüşümüzdə daha yaxşı formada olacağımıza inanıram. Ola bilsin ki, son 15-20 dəqiqədə yorğunluq hiss olunsun. Amma buna baxmayaraq, lazım olan epizodlarda sürəti qaldıra bilirdilər. Çətin idi. Ancaq hər halda bu, normaldır. Əvvəlki günlərdə çox yüklənmişdik. Hazırlığımız düşündüyümüz plan üzrə gedir”.

Qurban Qurbanov yeni transferlərin uyğunlaşma prosesindən və “Minay”dan heyətə cəlb olunan Rüstəm Əhmədzadə haqda da danışıb:

“Yeni qoşulanların hazırlıqları əvvəldən burada olan futbolçulardan bir qədər aşağıdır. Çünki gec qoşulublar, daha çox məşqsiz qalıblar. Ona görə də bir az ehtiyatlanırıq. Öz optimal formalarına burada olan futbolçularımızla müqayisədə daha gec çatacaqlar. Hər halda, istəkli olmalarından razıyam və inanıram ki, daha tez optimal formalarına qayıdacaqlar.

Kimlərsə daim əsas heyətdə olacaq deyə bir şey yoxdur. Hər oyunçunun yükləmələrə necə dözə bildiyini görmək üçün iki oyun keçirdik. Qarşıda yenə bir gündə iki matçımız var. Heyətdə bəzi rotasiyalar olacaq. Hansı oyunçu daha hazırlıqlıdısa, tapşırıqlara daha düzgün, diqqətli əməl edirsə, o da şans qazanacaq. Hər futbolçumdan razıyam.

Rüstəm Ukraynada daha çox sağ cinahda oynayırdı. Mən xoşlayıram ki, sağda solaxay oyunçu olsun. Amma bəzi rəqiblərə qarşı fərqli sistemdən istifadə edə bilərik. Rüstəm çox sürətli futbolçudur. “Baçka Topola” ilə oyunda da bundan yaxşı istifadə etdi. Rüstəmi sağda, hücumun mərkəzində yoxlamaq istəyirik. Çalışacağam ki, qarşıdakı aylarda onun tam potensialını ortaya çıxarmaq üçün bəzi mövqe dəyişiklikləri edək. Rüstəm Əhmədzadə gələcəyə ümid verən futbolçudur”.