“Qarabağ” tarixi rekordu təkrarladı

“Qarabağ” Azərbaycan Premyer Liqasının 27-ci turunda “Sumqayıt”ı məğlub edib (6:0).

Komanda.az xəbər verir ki, həmin matç Ağdam təmsilçisi üçün əlamətdar olub. Qurban Qurbanovun yetirmələrinin səfər matçlarındakı məğlubiyyətsizlik seriyası 23-ə çatıb.

Ağdam təmsilçisi 2022/23 mövsümündə rəqib meydanındakı 14 matçda uduzmayıb. Ötən mövsümün son 9 səfərində də xalsız qalmayan “köhlən atlar” sonuncu dəfə 2021-ci il oktyabrın 25-də “Səbail”lə oyunda uduzub (1:3). Rəqib meydanında keçirilən son 23 qarşılaşmada 19 qələbəsi olan “Qarabağ” 4 dəfə “sülh”ə razılaşıb.

Nəticədə, Azərbaycan çempionatları tarixinin rekordu təkrarlanıb. Öncədən 1999-2001-ci illərdə ardıcıl 23 səfər oyunundan məğlubiyyətsiz ayrılan “Şəmkir” mütləq rekordçu idi. “Qarabağ” bu göstəricini 22 ildən sonra təkrarlamağa nail olub. Ağdamlılar növbəti səfər qarşılaşmasında yeni rekord müəyyənləşdirə bilər.