“Qarabağ” “Neftçi”dən də üstündü”

Azərbaycan Premyer Liqasının 3-cü turu çərçivəsində öz meydanında “Qarabağ”a 0:4 hesablıyla məğlub olan Aftandil Hacıyev mətbuat konfransı keçirib.

Komanda.az xəbər verir ki, gənc mütəxəssis darmadağını belə şərh edib:

• “Qarabağ”ı Avropa Liqasının qrup mərhələsinə vəsiqə qazanması və bu qələbə münasibətilə təbrik edirəm. Bu gün məğlub olmaq istəmirdik. Bilirdik ki, rəqib səhvləri bağışlamır. Buna baxmayaraq, futbolçular çox səhvlər etdi. İlk qoldan sonra toplarlanmaq istəsək də, “Qarabağ”a qarşı bunu etmək çətindi. “Qarabağ”la digər komandalar arasında kəskin fərq var. Bu, hər mənada belədi. Ruhdan düşmürük, fasilədən istifadə edib, daha yaxşı oyun göstərməyə çalışacağıq.
• Qola qədər təzyiq edərək başladız. Amma qol buraxıldıqdan sonra komanda bunu davam etdirə bilmədi. Komanda “Qarabağ”dan qorxdu?
• Hesab açıldıqdan sonra da hücum edirdik, şansımız da oldu. Rəqib topa sahib olmada hər zaman üstün olur. “Qarabağ” da usta futbolçulardan ibarət komandadı.
• Hər həftə komandanı bir legioner tərk edir. Növbəti futbolçu kimdir?
• Bu, bizi təəssüfləndirir. Kimin tərk edəcəyini mən deyə bilmərəm. Bunu futbolçuların ixtiyarına buraxmışıq. Amma düşünmürəm ki, bundan sonra komandanı kimsə tərk etsin. Ən azı qışa qədər bu heyətlə davam edəcəyik.
• Maykl Essyenin komandada qalması nə dərəcədə faydalıdı?
• Bu gün komandanı tərk etmək futbolçuların ixtiyarına verilib. Daha çox yerli futbolçulardan istifadə etməyə çalışacağıq.
• Komandanızın “Qarabağ”la başa-baş mübarizə apara bilmədiyini dediz. Bəs Azərbaycan çempionatında belə komanda var?
• “Qarabağ” Azərbaycan səviyyəsini aşıb. Artıq bunu qəbul etmək lazımdı. Hətta digər ölkələrin çempionatında iştirak edəcək səviyyədədi.
• Hətta “Neftçi” də “Qarabağ”la başa-başa mübarizə apara bilməz?
• “Neftçi”də də keyfiyyətli futbolçular var. Amma buna baxmayaraq, “Qarabağ” “Neftçi”dən də üstündü. Bundan sonra biz də səviyyəmizə uyğun rəqiblərlə oyunlarda sərfəli nəticə əldə etməyə çalışacağıq.
• Bu heyət Avropa Liqasına qatılmaq üçün kifayətdi?
• Bizim qarşımıza belə məqsəd qoyulmayıb, keçən il də belə hədəf qoyulmamışdı. Bundan sonra da əlimizdən gələni edəcəyik.

Aygül Qarayeva