“Qəbələ” – “Zirə”: 18-ci duel

Azərbaycan Premyer Liqasının 25-ci turunda “Qəbələ” öz meydanında “Zirə” ilə qarşılaşacaq.

Komanda.az klubun rəsmi saytına istinadən xəbər verir ki, mükafatçılar sırasına düşmək üçün mübarizə aparan “qırmızı-qaralar” rəqibini Qəbələ şəhər stadionunda qəbul edəcək.

Bu qarşılaşma iki komanda arasında 18-ci duel olacaq. İndiyədək keçirilən 17 oyunda “Qəbələ” 6 qələbə qazanıb və 7 heç-heçə edib. Paytaxt təmsilçisi isə 4 dəfə qalib gəlib. Top fərqində də “qırmızı-qaralar” üstündür – 23:15. “Qəbələ”nin qollarına 14 futbolçu və avtoqol müəllifi olan rəqib oyunçu imza atıb. Aleksey Qay “Zirə”ylə görüşlərdə hamıdan çox – 4, Ermin Zets 3 qol vurub.

Əvvəlki 17 oyundan ikisi kubok, 15-i Premyer Liqa çərçivəsində baş tutub. Çempionatdakı matçlarda rəqiblər hərəyə 4 dəfə qalib gəlibsə, 5 dəfə “sülh”lə ayrılıblar. Bu oyunlarda “Qəbələ” 16 qol vurub, 13-nü buraxıb.

Aprelin 19-da keçiriləcək “Qəbələ” – “Zirə” saat 16:00-da başlayacaq.