Premyer Liqa klubundan yeni transfer rekordu

İngiltərənin “Nyukasl” klubu heyətini yeni futbolçu ilə gücləndirib.

Komanda.az xəbər verir ki, Premyer Liqa təmsilçisi paraqvaylı yarımmüdafiəçi Migel Almironu heyətinə qatıb. Bu barədə klubun rəsmi saytı məlumat yayıb.

ABŞ təmsilçisi “Atlanta Yunayted”dən transfer olunan 24 yaşlı futbolçu ilə 5,5 illik müqavilə imzalanıb.

“Nyukasl” bu transferə görə MLS klubuna 21 milyon funt-sterlinq təzminat ödəyib. Bu isə klub tarixində rekord göstəricidi. Premyer Liqa klubunun bundan öncəki rekordu 2005-ci ildə Madrid “Real”ından alınan Maykl Ouenə görə ödənilən təzminat idi (16 milyon funt-sterlinq).

“Atlanta Yunayted”in heyətində müxtəlif turnirlər çərçivəsində 69 oyuna çıxan Almiron 22 qola imza atıb.