Qvardiolanı özünə heyran edən özbək futbolçu – Yazı+Foto

Son günlərdə adı “Mançester Siti” kimi nəhəng klubla hallanan özbək futbolçu Abdukodir Xusanovun kim olduğu sualı onun həyatı və tərcümeyi-halı haqqında öyrənmək istəyən bir çox insanı maraqlandırır. Futbolçu karyerasına erkən yaşlardan başlayan Xusanov qış transfer dönəmində beynəlxalq arenada diqqət çəkən biridir. Bəs, Abdukodir Xusanov kimdir, necə oldu ki, birdən-birə hamı ondan danışmağa, yazmağa başladı?

Abdukodir Xusanov futbolçu karyerasına erkən yaşlarda başlayıb. Xüsusilə, müdafiəçi kimi diqqət çəkən Xusanov hazırda Fransanın “Lans” klubunda çıxış edir.

2004-cü il fevralın 29-da Özbəkistanın paytaxtı Daşkənddə anadan olan Xusanov gənc yaşlarından istedadını nümayiş etdirərək, karyerasına diqqət çəkdiyi “Bunyodkor” klubunda başlayıb. O, ilk peşəkar addımını Belarusun “Energetik-BGU Minsk” klubunda atıb və burada mühüm irəliləyiş əldə edib. Boyu və müdafiədəki effektivliyi ilə seçilən Xusanov daha sonra Fransanın “Lans” klubuna transfer olunub.

Xusanov Belarusa 2022-ci ildə köçüb və “Energetik-BGU Minsk”də yaxşı, diqqətləri çəkəcək şəkildə çıxış edib. Burada bir mövsüm keçirdikdən sonra 2023-cü ildə Fransanın “Lans” klubuna transfer olunub. O, Liqa 1-dəki ilk mövsümündə UEFA Avropa Liqası kimi beynəlxalq turnirlərdə iştirak edərək, əhəmiyyətli təcrübə qazanıb. Özbəkistan millisində də çıxış edən Xusanov 2023-cü ildən beynəlxalq arenada özünü göstərməyə başlayıb.

Bir müddət əvvəl adı “Fənərbaxça” ilə də hallanan Xusanovun xidmətində İngiltərənin top-klubu “Mançester Siti” maraqlıdır. Xüsusən də, İngiltərə klubunun baş məşqçisi Peo Qvardiolanın şəxsən özünün özbək müdafiəçinin transferində maraqlı olduğu deyilir. Tərəflər artıq razılığa gəlməyə yaxındırlar. Transferin dəyəri təxminən 50 milyon avro təşkil edəcək. Bu keçid baş tutsa, Xusanov indiyə qədər türk dünyasının ən bahalı transferi kimi tarixə düşəcək.

Abdukodir Xusanovun futbolçu hekayəsi Avropa klublarına gedə bilməyən, gedənləri də ehtiyatda qalan, özünü heç cür sübut edə bilməyən azərbaycanlı oyunçulara nümunə olmalıdır.

Fəxri Rüstəmli