Ozan Can “Eyndhoven”ə qələbə qazandırdı

Futbol üzrə Niderland birinci divizionunda 19-cu turun oyunları keçirilib.

Komanda.az xəbər verir ki, Azərbaycan milli komandasının yarımmüdafiəçisi Ozan Can Kökçünün formasını geyindiyi “Eyndhoven” də növbəti matçına çıxıb.

Sözügedən kollektiv səfərdə “Utrext”in ikinci komandası ilə qarşılaşıb. 7 qolun qeydə alındığı matç futbolçumuzun komandasının qələbəsiylə bitib – 5:2.

Ozan da bu görüşün iştirakçısı olub və 90 dəqiqə oynayıb. O, 90+3-cü dəqiqədə fərqlənməklə matçın yekun nəticəsini rəsmiləşdirib. Ozan bu görüşdə iki qolun məhsuldar ötürmə müəllifi də olub.

“Eyndhoven” hazırda 29 xalla 20 kollektiv arasında 10-cu pillədə qərarlaşıb.