Messinin “axmaq” adlandırdığı futbolçudan açıqlama

Niderland yığmasının və “Beşiktaş”ın hücumçusu Vaut Veqhorst Lionel Messi haqda danışıb.

Komanda.az CNN-ə istinadən xəbər verir ki, o, Argentina millisinin kapitanını tarixin ən yaxşı oyunçularından biri adlandırıb:

“Mənim üçün oyun zamanı hamı bərabərdir. Mən həmişə döyüşürəm. Həmin matçda da mübarizə apardım. Oyun zamanı Messi ilə bir neçə mübahisəmiz oldu. Bu, onu təəccübləndirdi. Ona böyük hörmətim var. Messi tarixin ən yaxşı oyunçularından biridir. Oyundan sonra ona olan hörmətimi göstərmək istədim. Amma görünür, buna hazır deyildi. Lakin indi adımı bilir. Bu, mənim üçün yaxşıdır”.

Argentina millisi DÇ-2022-nin 1/4 finalında əsas və əlavə vaxtı 2:2 hesabı ilə bitən görüşün penaltilər seriyasında Niderlandı məğlub edib (4:3).

35 yaşlı Messi oyundan sonra Veqhorstu təhqir edərək, “Nə baxırsan, axmaq? Get buradan! Get işinlə məşğul ol” deyib.

Argentina millisi DÇ-2022-nin finalında Fransanı penaltilər seriyasında məğlub edərək (3:3, penaltilər – 4:2), tarixində üçüncü dəfə dünya çempionatının qalibi olub. Cənubi Amerika təmsilçisi 1978 və 1986-cı illərdə də dünyanın ən güclü komandası adını qazanıb.