“Omoniya” “Qarabağ”la oyuna aparıcı futbolçuları olmadan çıxacaq

Kiprin “Omoniya” klubu Bakıda “Qarabağ”a qarşı keçirəcəyi UEFA Konfrans Liqasının qrup mərhələsinin 5-ci tur oyununda bəzi əsas futbolçularından istifadə etməyəcək.

Komanda.az “24sports”a istinadən xəbər verir ki, Nikosiya təmsilçisinin baş məşqçisi Henninq Berq turnirdə iddiaları qalmadığı üçün fərqli start heyətlə meydana çıxacaq.

52 yaşlı norveçli mütəxəssis aparıcı oyunçularından yalnız daxili çempionatda yararlanmaq niyyətindədir. “Omoniya” Kipr çempionatında 8 oyundan sonra 10 xalla 8-ci yerdədir.

Noyabrın 25-də Tofiq Bəhramov adına Respublika stadionunda keçiriləcək “Qarabağ” – “Omoniya” matçı saat 21:45-də başlayacaq.

Dörd oyundan sonra 10 xal toplayan “Qarabağ” H qrupunda liderdir və vaxtından əvvəl pley-offa vəsiqəni təmin edib. Kipr klubu isə 2 xalla 3-cü sırada qərarlaşıb.