“Omoniya” cərimə ödəyəcək – “Qarabağ”a görə

UEFA-nın Nəzarət, Etika və İntizam Komitəsi “Qarabağ”ın Konfrans Liqasındakı rəqiblərindən olan “Omoniya”nı (Kipr) cərimələyib.

Komanda.az UEFA-ya istinadən xəbər verir ki, Nikosiya klubunun azarkeşlərinin evdə “Qarabağ”a qarşı keçirilən qrup oyununda meydana yad əşyalar atması cəriməyə səbəb olub.

“Omoniya” 3 750 avro məbləğində cərimə olunub. Kipr klubu qərar verildikdən sonra 90 gün müddətində cəriməni ödəməlidir.

Hadisə “Qarabağ”ın 4:1 hesablı qələbəsi ilə bitən matçın 52-ci dəqiqəsində baş verib. “Köhlən atlar”ın yarımmüdafiəçisi Kadi Borges hesabı bərabərləşdirdikdən sonra qolu qeyd etmək üçün meydanın kənarına gedib. Bu zaman kiprli tərəfdarlar meydana su şüşələri atıblar.