Nuri Şahin: “Biz də çempion olacağıq”

Dortmund “Borussiya”sının baş məşqçisi Nuri Şahin Leverkuzen “Bayer”i ilə oyun öncəsi jurnalistlərə açıqlama verib.

Komanda.az xarici KİV-ə istinadən xəbər verir ki, türk çalışdırıcı bir az vaxt lazım olduğunu bildirib:

“Elə hiss olunur ki, Xabi Alonso “Bayer”in baş məşqçisi təyin edildikdən sonra hər şey alt-üst oldu. Komanda çempionluğu bacardı. Onlar bunu çox istəyirdilər. Biz də buna nail olacağıq, sadəcə, bir az vaxt lazımdır”.

“Borussiya” bu gün saat 23:30-da doğma meydanda “Bayer”i qəbul edəcək. Komanda 15 turdan sonra Bundesliqada turnir cədvəlinin 6-cı pilləsində qərarlaşıb və lider “Bayern”dən 11 xal geri qalır.