“Bayern”də heç kim mövsümü kuboksuz başa vurmaq istəmir” – Noyer

“Bayern”in qapıçısı Manuel Noyer komandasının yeni mövsüm üçün hədəflərindən danışıb.

Komanda.az Münhen klubunun mətbuat xidmətinə istinadən xəbər verir ki, almaniyalı futbolçu “Bayern”də heç kimin ötən il olduğu kimi, mövsümü kuboksuz başa vurmaq istəmədiyini bildirib:

“Bayern”də heç kim 2012-ci ildən bəri ilk dəfə ötən il olduğu kimi, mövsümü kuboksuz başa vurmaq istəmir. Ona görə də, komandanın ən vacib məqsədi trebl qazanmaqdır. Lakin bunun üçün çox çalışmaq lazımdır.

Biz komanda olaraq birlikdə böyüməli və meydanda əlimizdən gələni etməliyik. Həm meydanda, həm də məşqçilər heyətində yeni komandamız var. Bu, kluba təzə “qan” və yeni enerji gətirib. Biz maksimum uğur qazanmaq istəyirik”.

38 yaşlı qolkiper dünən Almaniya millisindəki karyerasını başa vurduğunu açıqlayıb.