“Neftçi”nin hücumçusu klubun azarkeşlərini təhqir etdi

“Neftçi”nin hücumçusu Baqali Dabo komandanın azarkeşlərini təhqir edib.

Komanda.az xəbər verir ki, Dabo əvvəlcə şəxsi “instagram” səhifəsinin hekayə bölməsindən “neftchi.baku.fan.page” adlı azarkeş səhifəsini təhqir edib, daha sonra öz fotosunu paylaşaraq, azarkeşlərin şərhlərinə qeyri-etik cavab yazıb.
 
Bunlara səbəb isə azarkeş səhifəsinin futbolçu haqda tənqidi paylaşımı olub.

“Neftçi”nin Avropa Liqasında uğursuz çıxışı, büdcəsinə görə özündən zəif  “Bney Yehuda”ya (İsrail) məğlub olması komandanın azarkeşlərini özündən çıxarıb. Bir neçə gün əvvəl “Neftçi”nin italiyalı baş məşqçisi Roberto Bordin və futbolçusu Kirill Petrov “Sabah”la oyunda (1:1) uğursuz çıxışlara görə stadionda istefa şüarı səsləndirən “Neftçi”nin fanatlarını “əsl azarkeş” saymadıqlarını demişdilər.

Baqali Dabo isə zədə səbəbindən “ağ-qaralar”ın Avropa Liqasındakı oyunlarında demək olar ki, iştirak etməyib. O, sadəcə, bəzi oyunlarda son dəqiqələrdə meydanda olub.