“Neftçi” Abasovla heç vaxt “Qarabağ”ın səviyyəsinə yaxınlaşmayacaq!

Fəxri Rüstəmli

Dünən Azərbaycan Premyer Liqasının 11-ci turunda “Neftçi” “Qarabağ”a 0:2 hesabı ilə məğlub oldu. Bu nəticə təkcə xal itkisi deyil, həm də “ağ-qaralar”ın indiki vəziyyətinin real göstəricisidir.

Samir Abasovun rəhbərliyi altında “Neftçi”nin “Qarabağ” səviyyəsinə çatması hələ ki, reallıqdan uzaq, boş xəyallardır. Düzdür, Abasovu Azərbaycan futbolunda az-çox tanınan simalardan saymaq olar. Amma “Neftçi” kimi ölkənin ən köklü, böyük klubu üçün bu, kifayət deyil. Komanda meydanda vahid oyun sistemindən, idman intizamından məhrum görünür. Rəhbərliyin və məşqçi heyətinin planları bir çox hallarda qeyri-müəyyən qalır, oyunu alınmayan komanda ilə bağlı hər bir yanlış qərar azarkeşlərin səbrini sınayır.

Hazırkı “Neftçi”yə baxanda gözə çarpan ilk şey liderlik çatışmazlığıdır. Topu ayaqda saxlamaq, hücumları sistemli şəkildə qurmaq – bunların hamısı güclü rəqiblərə qarşı çatışmır. “Qarabağ”la qarşılaşmada da aydın görünürdü ki, taktiki hazırlıq və komanda ruhu baxımından ciddi fərq var. Sadəcə olaraq, Samir Abasovun yetərincə gücü yoxdur ki, bu fərqi aradan qaldırsın.

Azarkeşlər üçün bu, ürəkaçan deyil. “Neftçi” tarixi və ənənələri ilə Azərbaycan futbolunun rəmzlərindəndir. Amma indiki vəziyyət onu göstərir ki, Abasovla uzunmüddətli perspektivdə real rəqabət qabiliyyəti yaratmaq çətindir. Gələcək üçün planlar varsa, əvvəlcə komandanın strukturu, oyun sistemi və liderlik rolu yenidən nəzərdən keçirilməlidir.

Həm də unutmayaq ki, futbol nəticələrdən başqa, ümid və inam oyunudur. Düzdür, Samir Abasov komandanı müəyyən səviyyəyə gətirib, amma “Qarabağ” kimi dominant bir rəqibə qarşı hələ ki, heç bir nəticə, parlaq oyun göstərmək mümkün olmur. “Neftçi” yenidən Azərbaycan futbolunun zirvəsinə dönmək istəyirsə, dəyişikliklərin vaxtı çatıb. Yeni taktika, yeni liderlər və əlbəttə ki, daha güclü futbolçu heyəti – bunlar olmadan köklü inkişafa nail olmaq çətindir.

“Neftçi”nin tarixində böyük uğurları var, amma indiki həqiqət acıdır: Samir Abasovla bu klub “Qarabağ” səviyyəsinə çatmayacaq, hətta heç yaxınlaşmayacaq da. Azarkeşlər isə ümidlərini itirmədən, hər yeni matçda komandalarını dəstəkləməyə davam edəcək. Çünki “Neftçi” sadəcə bir komanda deyil, Azərbaycanın futbol mədəniyyətinin bir hissəsidir.