“Neftçi” “Turan Tovuz”la oyundakı hakimlikdən bu epizodlara görə şikayət edir – VİDEO

Azərbaycan Premyer Liqasının 3-cü turunda keçirilmiş “Neftçi” – “Turan Tovuz” matçında baş hakim Əliyar Ağayevin mübahisəli qərarlarına türkiyəli sabiq FİFA referisi Deniz Ateş Bitnel münasibət bildirib.

Komanda.az xəbər verir ki, “Neftçi”nin mətbuat xidməti bununla bağlı videomaterial hazırlayıb.

Bitnel 55-ci dəqiqədə İqor Ribeyroya göstərilən mübahisəli qırmızı vərəqəni, 21-ci dəqiqədə Bassala Sambunun rəqibin müdaxiləsi ilə cərimə meydançasında yerdə qaldığı anda mümkün qayda pozuntusunu və 11-ci dəqiqə İmad Faraja qarşı aşkar kobudluğa rəğmən, hakimlərin heç bir sanksiya tətbiq etmədiyi epizodu dəyərləndirib.

“Neftçi” “Turan Tovuz”la oyundakı hakim səhvlərinə etirazını bildirib. Ötən mövsüm yanlış hakim qərarlarından əziyyət çəkdiyini bildirən klub bu mövsüm eyni səhvlərin təkrarlanmasını istəmir. Bununla əlaqədar olaraq “Neftçi”nin AFFA və PFL-ə müraciət ünvanlayacağı da gözlənilir.