“Neftçi” Dabonun cəzasını açıqladı

“Neftçi” klubu futbolçusu Baqali Daboyla bağlı qərarını açıqlayıb.

Komanda.az xəbər verir ki, bu barədə klubun rəsmi saytı məlumat yayıb. “Ağ-qaralar”ın yaydığı məlumatda bunlar qeyd olunub:

“Məlumat verdiyimiz kimi, klub rəhbərliyi futbolçu Baqali Dabonun sosial şəbəkədəki davranışını ciddi şəkildə nəzarətə götürüb. “Neftçi” ailəsinə qarşı bu cür hörmətsizliyi qəbuledilməz hesab edərək, ötən gün ərzində məsələ ilə bağlı intizam dinləməsi keçirib və futbolçuya davranışına görə öz mövqeyini bildirmək imkanı yaradıb. Aparılan müvafiq müzakirələrdən sonra heç bir əsaslandırma olmadığına görə artıq futbolçuya qarşı maliyyə sanksiyasını tətbiq etmək haqqında qərar qəbul olunub. Həmçinin məşqçilər korpusunun rəyi əsasında, futbolçu təxirə salınan futbol mövsümünün qalan hissəsi üçün komandanın planlarına daxil olmadığına görə qüvvədə olan müqavilənin başa çatdığı günə – 30 iyun 2020-ci il tarixinə qədər fərdi məşqlərlə kifayətlənəcək”.

Baqali Dabonun həyat yoldaşı bir neçə gün əvvəl sosial şəbəkə hesabında futbolçunun “Qarabağ”ın formasını geyindiyini əks etdirən video paylaşıb.