Nazir Rafael Fiziyevlə görüşdü

Avqustun 4-də gənclər və idman naziri Fərid Qayıbov Azərbaycanın məşhur MMA döyüşçüsü Rafael Fiziyevi qəbul edib.

Komanda.az xəbər verir ki, idmançını ölkəmizin bayrağı altında qazandığı ilk qələbəsi münasibətilə təbrik edən nazir onun bu uğurunun gənclər arasında MMA idman növünə marağı daha da artıracağına inandığını bildirib.

Xatırladaq ki, MMA döyüşçümüz Rafael Fiziyev ötən ay Mütləq Döyüş Çempionatında (UFC) növbəti görüşündə braziliyalı Rafael dus Anyusa nokautla qalib gəlib. Bu, onun UFC-də ardıcıl 6-cı qələbəsidir.

Səmimi qəbula görə təşəkkürünü bildirən Rafael Fiziyev Azərbaycanı təmsil etməkdən qürur duyduğunu bildirib və bundan sonrakı döyüşlərə hazırlığı barədə məlumat verib.

Sabah Rafael Fiziyevin media nümayəndələri ilə görüşü və idman azarkeşləri ilə imza sessiyası olacaq.