“Murad Musayev həm yaxşı insan, həm də möhtəşəm məşqçidir” – MÜSAHİBƏ

“Sabah”ın nigeriyalı hücumçusu Emmanuel Apehin Komanda.az saytına müsahibəsi:

• Ötən ilin yayında “Sabah”a keçmisən. Bundan öncə yalnız İspaniya klublarında çıxış etmisən. Liqalar arasında müqayisə aparsaq, Azərbaycan Premyer Liqası çoxmu geri qalır?
• Bəli, ötən ilin yayından “Sabah”ın uğurları üçün çalışıram. Burada olmaqdan şadam. Liqaları müqayisə etmək çətindir. Çünki hər çempionatın spesifik xüsusiyyətləri olur. Amma sırf İspaniya çempionatı ilə müqayisə etsək, bəli, İspaniya çempionatı daha çətin liqadır.

• Azərbaycan klubuna keçidini karyeranda necə dəyərləndirirsən?
• Düzü, Azərbaycandakı həyata uyğunlaşmaq o qədər də asan olmadı. Amma artıq uyğunlaşdığımı deyə bilərəm. Sırf futbol baxımından yanaşsaq, bizim yaxşı, mehriban kollektivimiz var. Burada olmaqdan şadam.

• “Sabah”a keçməzdən öncə Azərbaycan futbolu və klubları haqda məlumatın var idi?
• Buraya gəlməmişdən öncə Azərbaycan futbolu barədə məlumatım çox az idi. Təklif gəldikdən sonra maraqlandım və bunun mənim üçün yeni çağırış olduğu qənaətinə gəldim. Bundan sonra təklifi müsbət cavablandırdım.

• Azərbaycan Premyer Liqasında oyun üslubunu çox bəyəndiyin oyunçular varmı?
• Premyer Liqada yaxşı, keyfiyyətli futbolçular var. Amma kimisə xüsusi fərqləndirə bilmərəm.

• Baş məşqçi Murad Musayevlə münasibətin necədir?
• Murad Musayev barədə nə deyə bilərəm? O, həm yaxşı insan, həm də möhtəşəm məşqçidir.

• Ölkə çempionatının 29-cu turunda autsayder “Səbail”ə uduzduz. Buna səbəb nə idi? Qələbə qazanmaq üçün nə çatışmırdı?
• Fikrimcə, qalib gəlmək və ya məğlub olmaq futbolun bir parçasıdır. Sadəcə, həmin oyunda bizdə alınmadı.

• Növbəti turda rəqibiniz “Qarabağ” olacaq…
• Bəli, “Qarabağ”la oyunlarımız həmişə maraqlı, əsl futbol abu-havasında keçir. Fikrimcə, bu dəfə də istisna olmayacaq və azarkeşlər meydanda baxımlı oyunun şahidi olacaqlar.

• 2022/23 mövsümündə “Sabah”ın heyətində 29 oyunda 7 qol vurmusan və 3 məhsuldar ötürmə etmisən. Necə düşünürsən, mövsümün sonuna qədər statistikada dəyişikliklər ola bilər?
• Hələ mövsümün sonuna var. Firkimcə, şans qazansam, bu nəticəni yaxşılaşdıra bilərəm. Mövsümün qalan hissəsində də əlimdən gələni edəcəyəm ki, komandamın yaxşı nəticə qazanmasına öz oyunumla töhfə verim.

• Demək olar ki, hər turdan sonra hakimlərdən şikayətlər olur. Sən də azərbaycanlı hakimlərdən narazısan, yoxsa..?
• Məncə, çempionatda yaxşı referilər var. Amma düşünürəm ki, daha yaxşı ola bilərlər.

• Yayda avrokuboklarda çıxış edəcəksiz. Hazırkı heyətlə uğur qazanmaq mümkün ola bilər, yoxsa daha da güclənməyə ehtiyac var?
• Məncə, bizim yaxşı komandamız var. Lakin komanda üçün nəyin yaxşı olduğuna klub rəhbərliyi qərar verə bilər.

• Səncə, “Sabah”ın hazırkı heyəti UEFA Konfrans Liqasında neçə mərhələ keçmək üçün yetərlidir?
• Bu barədə danışmaq bir qədər tezdir. Lakin çox istərdik ki, yaxşı nəticə qazanaq və azarkeşlərimizi sevindirək. Bunun üçün həmin oyunlara kimi var qüvvəmizlə çalışmalı və daha da inkişaf etməliyik.

Rövşən Əlisoy