Azərbaycan millisinin üzvü: “Rumıniyadakı zal istənilən səviyyədə deyil”

Azərbaycan millisinin futzalçısı Amadeu DÇ-2024-ün elit mərhələsində Rumıniya ilə keçiriləcək səfər oyunu ərəfəsində Azərbaycan Futzal Federasiyasının mətbuat xidmətinə açıqlama verib.

Komanda.az xəbər verir ki, Braziliya əsilli müdafiəçi görüşün baş tutacağı məkanda keçirdikləri ilk məşqdə müəyyən çətinliklərlə üzləşdiklərini söyləyib:

“Rumıniyadakı zal istənilən səviyyədə deyil. Yol yorğunluğuna baxmayaraq, Rumıniyadakı ilk məşqimiz normal alındı. Baş məşqçinin tapşırıqlarını yerinə yetirməyə çalışdıq. Ancaq bizdən əvvəl həndbolçular məşq etdiyi üçün zalda örtük yapışqan idi. Ümid edirəm ki, növbəti məşqə qədər təmizləyərlər.

Hər kəs qələbə haqqında düşünür. Uğurlu başlanğıc növbəti oyunlarda daha yaxşı nəticə qazanmağımız üçün vacibdir. Daha bir məşqimiz olacaq. Bütün gücümüzü səfərbər edərək, bura qədər çəkdiyimiz əziyyətin bəhrəsini görmək istəyirik. Çünki Rumıniya ilə matçdan sonra Bakıda Niderlandla görüşəcəyik. Həmin oyuna qalib əhvalda çıxmaq lazımdır.

Onların 2 oyunlarına baxmışam. Heyətlərində Braziliyaəsilli 4 futzalçı var. Çox çətin qarşılaşma olacaq. Şansları qaçırmaq olmaz. Elə matçdır ki, həmin gün kim yaxşı köklənsə, imkanları düzgün dəyərləndirsə, qələbə qazanacaq.

Rumıniya güclü rəqiblərdəndir. Niderland isə hər matçda sürpriz edəcək gücdədir. Son illər inkişafdadır, heyətlərində fərdi qabiliyyətinə görə seçilən oyunçular var. Təkbətək mübarizələrdə güclüdürlər. Qazaxıstan yığması haqqında isə ətraflı danışmağa dəyməz. Onlar son illər böyük yarışların final mərhələsində oynamağa adət ediblər. Qrup birincisi olmaq baxımından komandamızın şansı 50/50-yədir”.

Xatırladaq ki, sentyabrın 15-də Buzau şəhərindəki “Romeo lamandi” zalında keçiriləcək Rumıniya – Azərbaycan oyunu saat 19:30-da start götürəcək.