“Milan” belçikalı hücumçu ilə yollarını ayırır

“Milan” belçikalı hücumçusu Divok Origi ilə müqaviləsini vaxtından əvvəl ləğv etməyə hazırlaşır.

Komanda.az “La Gazzetta dello Sport”-a istinadən xəbər verir ki, tərəflər artıq danışıqların son mərhələsindədir və yalnız bir neçə hüquqi detalın razılaşdırılması qalır.

Müqavilənin ləğvi 2026-cı ilin yanvarına qədər rəsmiləşməlidir.

Origi “Milan”a 2022-ci ildə “Liverpul”dan keçib və klubla müddəti 4 il olan müqavilə imzalayıb. Onun illik maaşı 4 milyon avro təşkil edir ki, bu da “qırmızı-qaralar”da Luka Modriç və Adrien Rabyodan (3,5 milyon avro) daha çoxdur.

Belçikalı futbolçunun “Milan” forması ilə son rəsmi oyunu 2023-cü il mayın 28-də “Yuventus”a qarşı keçirilən A Seriyası matçı olub. Həmin görüşdə Origi cəmi 4 dəqiqə meydanda qalıb.

Klub yayda 31 yaşlı forvardla yolları ayırmaq üçün danışıqlar aparsa da, razılıq əldə olunmamışdı. Son vaxtlar isə proses xeyli sürətlənib və ayrılığın yaxın zamanda rəsmiləşəcəyi gözlənilir.