Messi çinlilərə hörmətsizlik edib? – Açıqlama

“İnter Mayami”nin hücumçusu Lionel Messi ölkəyə qarşı hörmətsizlik ittihamları fonunda çinli azarkeşlərə müraciət edib.

Komanda.az xəbər verir ki, argentinalı futbolçu “Weibo”-da açıqlama verərək, bir müddət əvvəl keçirilən yoldaşlıq matçında iştirak etməməsinin səbəbinin səhhətində olan problemlə bağlı olduğunu bildirib:

“İnsanların siyasi səbəblərə və buna bənzər şeylərə görə oynamaq istəmədiyimi söylədiklərini eşitmişəm. Amma bu heç də doğru deyil. Belə olsaydı, mən dəfələrlə etdiyim kimi Çinə getməzdim. Karyeramın ilk günlərindən Çinlə çox yaxın münasibətim olub. Amma mətbuat konfransında dediyim kimi, mənim əzələ ilə bağlı problemim var idi”.

Hücumçu son vaxtlar Çin sosial mediasında tənqid atəşinə tutulub. O, Honq Konq millisi ilə “İnter Mayami” arasında yoldaşlıq görüşünü buraxıb. Görüş Amerika klubunun 4:1 hesablı qələbəsi ilə yekunlaşıb. Oyuna 38 mindən çox azarkeş gəlib.