Mareska “Mançester Yunayted”dəki baş məşqçi dəyişikliyindən danışdı

“Çelsi”nin çalışdırıcısı Enzo Mareska “Mançester Yunayted”dəki baş məşqçi dəyişikliyindən danışıb.

Komanda.az xarici KİV-ə istinadən xəbər verir ki, italiyalı mütəxəssis “Çelsi”yə qarşı oyunda “Mançester Yunayted”i Rud van Nistelroyun meydana çıxaracağını düşünür:

“Düşünürəm ki, bizə qarşı oyunda “Mançester Yunayted”i Nistelroy meydana çıxaracaq. O, mənim dostumdur, birlikdə oynayırdıq, indi də əlaqə saxlayırıq”.

“Qırmızı şeytanlar”ın rəhbərliyi niderlandlı mütəxəssis Erik ten Haqı vəzifədən azad etmək qərarına gəlib. Nistelroy müvəqqəti baş məşqçi təyin edilib. O, bu gün baş tutacaq “Lester”lə kubok matçında komandaya rəhbərlik edəcək.

“Mançester Yunayted”in bazar günü “Çelsi”yə qarşı keçiriləcək Premyer Liqa matçında komandaya Ruben Amorim rəhbərlik edə bilər. İngilislər artıq portuqaliyalı mütəxəssisin müqaviləsində sərbəst buraxılma variantını aktivləşdirməyə hazır olduqlarını bildirib. “Sportinq” Amorimə görə təxminən 10 milyon avro təzminat alacaq.