“Bu da Çempionlar Liqasının bir qəribəliyidir” – Qvardiola

“Mançester Siti”nin baş məşqçisi Xosep Qvardiola Çempionlar Liqasının 1/8 finalında “Real”ı məğlub etdikləri oyundan sonra fikirlərini bildirib.

Komanda.az UEFA-nın mətbuat xidmətinə istinadən xəbər verir ki, ispan mütəxəssis, 2:1 hesabıyla bitən görüşü belə şərh edib:

“Vacib olan necə oynadığımızdır. Bura qazanmaq üçün gəlmişdik. Və bu stadionda istədiyimizə nail olduq. Ancaq bu hələ birinci oyun idi, bunun cavabı da olacaq. Üstün ola bilərik, ancaq təcrübəsi ilə bu vəziyyəti düzəldə biləcək yeganə komanda da “Real”dır.

Yaxşı nəticə əldə etdik. Bundan əvvəlki iki pley-off oyununda qol vura bilməmişdik. Həmin oyunlarda çox yaxşı oynayıb, imkanlar yaratsaq da, qol vura bilmirdik. Amma bu gün bunu bacardıq. Bu da Çempionlar Liqasının bir qəribəliyidir.

“Santyaqo Bernabeu”da qazanmaq zövqvericidir. Belə nəticələrə öyrəşməmişik. Ancaq bu o deməkdir ki, istənilən stadiona gedib, qələbə qazana bilərik”.

“Mançester Siti” ilə “Real” arasındakı cavab matçı martın 17-də keçiriləcək.