“Biz Qvardiolaya təşəkkür etməliyik” – Keçmiş futbolçu

“Liverpul”un keçmiş müdafiəçisi Cimi Karrager “Mançester Siti”nin Premyer Liqada dominantlığını davam etdirib-etdirməyəcəyi ilə bağlı sualı cavablandırıb.

Komanda.az “Sky Sports”-a istinadən xəbər verir ki, ingiltərəli sabiq futbolçu, Pep Qvardiolanı dayandırmağı bacaran şəxslərin Joze Mourinyo və Yurgen Klopp olduğunu bildirib:

“Təəssüf ki, bəli. “Arsenal” əsas rəqib olacaq, lakin Pep Qvardiola demək olar ki, həmişə liqa titulunu qazanır. Onu dayandıra bilən şəxslər “Real”da Joze Mourinyo və “Liverpul”da Yurgen Klopp idi. Bu, bunun nə qədər çətin olduğunu göstərir.

Və son iki mövsümdə çempionluğa nə qədər yaxınlaşdıqlarını nəzərə alsaq, “Arsenal” üçün çətin idi. Ancaq “Liverpul”dan bilirəm ki, “Mançester Siti” çox çətin komandadır. Düşünürəm ki, əksər neytral azarkeşlər bu dəfə Premyer Liqada fərqli qalibin olacağına ümid edirlər. Mən də eyni şeyi istəyirəm, çünki hər il eyni komandanın qalib gəldiyini görmək istəmirsiz.

Amma biz “Mançester Siti” və Qvardiolaya təşəkkür etməliyik. Onun gördüyü işləri və qurduğu komandanı nəzərə alsaq, onları məğlub etmək son dərəcə çətindir”.

“Mançester Siti” ardıcıl 4 (2020/21-dən 2023/24-ə qədər) və son 7 ildə 6 dəfə İngiltərə çempionu olub.